MOVA იმ ადამიანებისთვის შევქმენი, რომლებიც თავადაც მუდმივად რაღაცას ქმნიან: კარიერას, ბიზნესს, ახალ იდენტობას, მომავალს. ამ ადამიანებს საერთო ღირებულებები - ცნობისმოყვარეობა, ამბიცია და იმის რწმენა აერთიანებთ, რომ ზრდა ხშირად ერთი სწორი ფიქრით იწყება.

MOVA-ს ვიზუალური სამყარო ერთდროულად სინემატოგრაფიულიც არის და შინაარსობრივად მდიდარიც. ამ სამყაროს ცენტრში კი წიგნებია - რომლებსაც ვკითხულობთ, ერთმანეთს ვჩუქნით, ვუზიარებთ, ხელნაწერ მიძღვნებს ვტოვებთ, ინტერიერს ვუხამებთ, ხელახლა ვკითხულობთ, ვფიქრობთ, არ ვივიწყებთ.

MOVA-ს მთელი გუნდი ვცდილობთ, რომ ისეთი წიგნები შემოგთავაზოთ, რომლებიც შეცვლის თქვენს მიმართებებს სამყაროსთან. ზოგი მათგანი გამბედაობას შეგმატებთ, ზოგიც დაგამშვიდებთ, მაგრამ ვფიქრობ, არასდროს გაგიჩნდებათ ის განცდა, რომ კითხვისას დრო დაკარგეთ. ჩვენ კარგად გვესმის, რომ დღეს ეს უკანასკნელი - საკმაოდ დიდ ფუფუნებას წარმოადგენს, შესაბამისად, სერიაში ნაწარმოების შეტანამდე - ყურადღებით ვუკვირდებით - რამდენად იქნება ის ჩვენი მკითხველისათვის საინტერესო აღმოჩენების მომტანი.

გულწრფელად მჯერა, რომ MOVA-ს წიგნებიდან არაერთ საგულისხმო მიგნებას წაიღებთ, რომელთაც შემდგომ თქვენეულ აღმოჩენად გარდაქმნით. არსებობისთვის მთავარი ხომ სწორედ ესაა - ვიაზროვნოთ და ჩვენი ხმა სხვებს გავაგონოთ.